Gal 1 | PltULB | STEP | Paoly, apostoly _ tsy apostoly avy amin’ny olona na tamin’ny alalan’ny olona, fa avy amin’i Jesosy Kristy sy ilay Andriamanitra Ray, izay nanangana Azy tamin’ny maty

Galatians 1

1 Paoly, apostoly _ tsy apostoly avy amin’ny olona na tamin’ny alalan’ny olona, fa avy amin’i Jesosy Kristy sy ilay Andriamanitra Ray, izay nanangana Azy tamin’ny maty _ 2 ary ireo rahalahy rehetra miaraka amiko, ho an’ireo fiangonan’ny Galatiana:

3 Fahasoavana ho aminareo ary fiadanana avy amin’Andriamanitra Raintsika sy Jesosy Kristy Tompo, 4 izay nanolotra ny tenany ho an’ny fahotantsika mba hanafahany antsika amin’izao andron’ny faharatsiana izao, araka ny sitrapon’Andriamanitsika sy Raintsika, 5 ho Azy anie ny voninahitra mandrakizay doria. Amena.

6 Gaga aho hoe niala faingana tamin’ilay niantso anareo tamin’ny fahasoavan’i Kristy ianareo. Gaga aho fa mitodika ho amin’ny filanzantsara hafa ianareo. 7 Tsy midika akory izany fa misy filanzantsara hafa, fa misy olona maromaro izay mitondra fikorontanana ho anareo ary te hanova ny filazantsaran’i kristy.

8 Fa na izahay na anjely avy any an-danitra aza no hitory filazantsara hafa aminareo noho izay nitorianay taminareo, dia aoka izy ho voaozona. 9 Araka izay nolazainay taloha, dia ankehitriny aho manambara indray hoe: “Raha misy olona manambara aminareo filazantsara hafa noho izay noraisinareo, dia aoka izy ho voaozona.” 10 Moa ve izaho ankehitriny mitady ny fakantoavan’ny olona sa Andriamanitra? Moa ve izaho mitady izay hampifaly ny olona? Raha mbola manohy miezaka ny hampifaly olona aho, dia tsy mpanompon’i Kristy.

11 Fa tiako ho fantatrareo, ry rahalahiko, fa ny filazantsara izay nambarako dia tsy filazantsaran’olombelona. 12 Tsy nandray izany tamin’olona aho, na nampianarina ahy izany. Fa kosa, izany dia fanambaran’i Kristy Jesosy tamiko.

13 Fa ianareo nahare ny amin’ny fiainako taloha tamin’ny fomba fivavahana Jiosy, sy ny fomba nanenjehako ny fiangonan’Andriamanitra mihoatra ny tokony ho izy ary ny fiezahako handrava izany. 14 Nandroso tamin’ny fivavahan’ny Jiosy aho nihoatra ny maro tamin’ireo nitovy taona tamiko, avy tamin’ireo iray firenena tamiko. Toy izany ny fomba nihazonako mafy ireo fomban-drazako.

15 Kanefa Andriamanitra, izay nanokana ahy hatrany an-kibon-dreniko, ary niantso ahy tamin’ny alalan’ny fahasoavany, 16 rehefa faly ny hampiseho ny Zanany lahy tamiko, mba hahafahako manambara Azy any amin’ny Jentilisa, dia tsy naka saina tamin’ny nofo sy ra avy hatrany aho. 17 Tsy niakatra tany Jerosalema ho any amin’ireo efa lasa Apostoly talohako aho. Fa kosa, nandeha tany Arabia ary avy eo niverina tany Damaskosy aho.

18 Ary telo taona taoriana dia niakatra tany Jerosalema mba hifankafantatra tamin’i Kefasy aho ary nijanona niaraka taminy nandritra ny dimy ambin’ny folo andro. 19 Fa tsy nisy hitako ireo Apostoly ankoatra an’i Jakoba, ilay rahalahin’ny Tompo. 20 Ary ao amin’izay soratako ho anareo, dia manome toky anareo aho eo anatrehan’Andriamanitra, fa tsy mandainga aho.

21 Avy eo aho dia nandeha tany amin’ny faritr’i Syria sy Kilikia. 22 Tsy mbola fantatra teo amin’ireo fiangonan’i Jodia izay ao amin’i Kristy aho. 23 Henon’izy ireo fotsiny izay voalaza hoe: “Ilay lehilahy izay nanenjika antsika fahiny ankehitriny dia manambara ilay finoana izay niezahany nopotehina taloha.” Noho izany izy ireo dia nidera an’Andriamanitra noho ny amiko.